Республиканың «Хәүефһеҙ һәм сифатлы юлдары»на федераль ҡаҙнанан миллиард һум бүленә

ӨФӨ, 2018 йыл, 28 февраль. /«Башинформ» мәғлүмәт агентлығы, Дарья Петрова/. Башҡортостан Хөкүмәте менән Росавтодор «Хәүефһеҙ һәм сифатлы юлдар» өҫтөнлөклө проекты сиктәрендә 2018 йылға килешеү төҙөнө. Ошо проектты тормошҡа ашырыу өсөн федераль бюджет республикаға миллиард һум аҡса йүнәлтә. Башҡортостан Транспорт һәм юл хужалығы буйынса дәүләт комитетының матбуғат комитетында әйтеүҙәренсә, республика ҡаҙнаһынан финанслау күләме 1,055 миллиард һум тәшкил итә, Өфө бюджетынан тағы 41 миллион бүленә. Проект Өфө агломерацияһы биләмәһендә ғәмәлгә ашырыла, баш ҡаланан тыш, уға Өфө, Благовещен, Иглин, Ҡырмыҫҡалы, Кушнаренко һәм Шишмә райондары ҡарай. Юл селтәренең дөйөм оҙонлоғо — 1317,5 саҡрым, бында М7 «Волга», М5 «Урал» һәм Р-240 Өфө — Ырымбур автомобиль трассаларының юл участкалары ла инә.

2018 йылда 86 объектта эштәр башҡарыу, шул иҫәптән Өфөләге 50 урамды төҙөкләндереү, 18 светофор, 21 фото- һәм видеотеркәү камераларын, юл билдәләрен ҡуйыу күҙаллана. Өфөлә һәм яҡын-тирәләге райондарҙа ремонтланырға тейешле урамдарҙың тулы исемлеге — Башҡортостандың Транспорт һәм юл хужалығы буйынса дәүләт комитеты сайтында.

http://www.bashinform.ru/news/1122542-na-bezopasnye-i-kachestvennye-dorogi-bashkirii-iz-federalnogo-byudzheta-vydelyat-1-milliard-rubley/