Башҡортостандың төпкөл урындарында йәшәүселәрҙе экологик һәм аграр туризм өлкәһендәге эшкә йәлеп итергә теләйҙәр

ӨФӨ, 2018 йыл, 1 февраль. /«Башинформ» мәғлүмәт агентлығы, Ольга Мортазина/. «Башҡортостан» милли паркы һәм «Шүлгәнташ» ҡурсаулығы биләмәһендә урынлашҡан ауылдарҙа йәшәүселәрҙе экологик һәм аграр туризм өлкәһендәге эшкә йәлеп итергә күҙаллайҙар. Дирекцияла хәбәр итеүҙәренсә, милли парк Рәсәй президенты грантына тормошҡа ашырылған «Киләсәкте бергәләп һаҡлайыҡ» программаһы партнеры булған. Төньяҡ-Көнбайыш федераль округы ҡурсаулыҡтары һәм милли парктары ассоциациялары, шул иҫәптән Карелияның «Костомукша» һәм «Калевал» тәбиғәт биләмәләре, Калининград өлкәһенең Ауыл туризмы ассоциацияһы, Алтай крайы милли парктары вәкилдәре ҡатнашлығында уҡытыу саралары һәм тәжрибә уртаҡлашыу буйынса осрашыуҙар уҙғарыласаҡ.

«Ойоштороусылар беҙҙе Европаның ҡурсаулыҡ биләмәләрен үҫтереүгә урындағы халыҡты йәлеп итеү тәжрибәһе менән таныштырҙы, — тип һөйләне Мәскәүҙә үткән беренсе семинарҙан һуң «Башҡортостан» милли паркы директоры Владимир Кузнецов. — Беҙгә уны үҙебеҙҙең паркта тормошҡа ашырыу эше тора. Парк хеҙмәткәрҙәрен һәм тораҡ пункттары вәкилдәрен уҡытасаҡбыҙ. Хәҙер төп бурыс – экотуризмды үҫтереүҙә ярҙам итергә әҙер һәм һәләтле кешеләрҙе һайлау».

http://www.bashinform.ru/news/1110871-zhiteley-glubinok-bashkirii-khotyat-privlech-k-rabote-v-sfere-ekologicheskogo-i-agrarnogo-turizma/