Күмертауҙа сыҡҡан ике вертолет Рәсәйҙең махсус тәғәйенләнештәге авиацияһын тулыландырасаҡ

ӨФӨ, 2018 йыл, 29 ғинуар. /«Башинформ» мәғлүмәт агентлығы, Ксения Калинина/. «Рәсәй вертолеттары» холдингының Күмертау авиация етештереү предприятиеһы март аҙағына тиклем заказ биреүсегә карапҡа ултырыу мөмкинлегенә эйә булған ике Ка-226Т еңел күп маҡсатлы вертолет тапшырасаҡ. Улар Рәсәй Федерацияһының махсус тәғәйенләнештәге авиацияһын тулыландырасаҡ.

Әлеге ваҡытта ике машина ла аҙаҡҡы йыйыу цехында, тағы ла ике вертолет етештереү кимәлендә. Бынан тыш, Федераль милли гвардия ғәскәрҙәре хеҙмәте мәнфәғәттәрендә предприятиела Ка-226Т вертолеты етештерелә. Был вертолет заказ биреүсегә 2018 йылдың июнь айында тапшырыласаҡ.

«Дәүләт оборонаһы заказы сиктәрендәге эш Күмертау предприятиеһы эшмәкәрлегенең төп йүнәлештәренең береһе булып тора. Был завод Рәсәйҙең диңгеҙ сиктәрен нығытыуға йоғонто яһаусы палуба вертолеттарын етештереү буйынса уникаль компетенцияларға эйә. Һуңғы йылдарҙа предприятие етештереү күрһәткестәренең ышаныслы үҫешен күрһәтә, ул Рәсәй көс ведомстволары тарафынан яңы заказдар ҡабул итеүгә тулыһынса әҙер», –тип билдәләне холдингтың генераль директоры Андрей Богинский.

«Ҡорола эшләүсе» төрөнән айырмалы рәүештә еңел күп маҡсатлы Ка-226Т вертолеты төп винт баштарын бөкләп ҡуйыу системаһына эйә. Вертолет өр яңы борт ҡорамалдары комплексы менән йыһазландырылған, ә уның компоненттары һәм системалары агрессив диңгеҙ шарттарында эшләүгә яраҡлаштырылған. Ҙур булмауына күрә машина караптарҙа һәм кесе һыу судноларында урынлаша ала. Карап вертолетын көндөҙ һәм төнөн ябай һәм ҡатмарлы метеорологик шарттарҙа эҙләү-ҡотҡарыу һәм транспорт мәсьәләләрен хәл итеү өсөн ҡулланырға мөмкин.

«Рәсәй вертолеттары» холдингы матбуғат хеҙмәтенән хәбәр итеүҙәренсә, дәүләт оборона заказы сиктәрендә Күмертау авиация предприятиеһы Ка-27 вертолеттарын йүнәтеү һәм яңынан ҡороу буйынса эштәр алып бара. Быйыл Рәсәй Оборона министрлығы ҡарамағына ҡалған дүрт Ка-27М вертолеты тапшырыласаҡ.

http://www.bashinform.ru/news/1109296-dva-kumertauskikh-vertoleta-popolnyat-sostav-aviatsii-spetsnaznacheniya-rossii/