Башҡортостанда дәүләт-шәхси партнерлыҡ тураһында килешеү төҙөгән предприятиелар мөлкәткә һалым буйынса льготаға эйә булды

ӨФӨ, 2017 йыл, 5 декабрь. /«Башинформ» мәғлүмәт агентлығы, Ольга Мортазина/. Башҡортостан Хөкүмәте дәүләт-шәхси партнерлыҡ сиктәрендә договор һәм концессия килешеүҙәре төҙөгән ойошмалар өсөн мөлкәткә һалым буйынса нуль ставкаһын билдәләне. Шул иҫәптән 2017 йылда башланған биш проект, уларҙың дөйөм суммаһы 34 миллиард һумдан ашыу тәшкил итә.

Улар — Мишкә районында ололар өсөн пансионат, Көнсығыш сығыу юлын төҙөү, Бөрөлә, Октябрьскийҙа һәм Федоровка районында торлаҡ-коммуналь хужалыҡ өлкәһендә концессия килешеүҙәре.

Бынан тыш, норматив-хоҡуҡи акттар республика һалым ҡануниәтендәге башҡа үҙгәрештәрҙе күҙ уңында тота. 100 миллион һумдан алып өҫтөнлөклө инвестиция проекттары өсөн һалым осоро өс йылға тиклем арттырыла. Шулай уҡ инвестиция күләме 5 миллиард һумдан ашыу булған өҫтөнлөклө инвестиция проекттары буйынса һалым льготалары күләмен билдәләгәндә капиталь һалыуҙарҙы раҫлау ваҡыты үҙгәртелде. Хәҙер был осор элек билдәләнгән өс йыл урынына 5-10 йыл тәшкил итә.

Закон 2018 йылдың 1 ғинуарынан үҙ көсөнә инә, тип хәбәр иттеләр республика Министрҙар кабинетының матбуғат хеҙмәтенән.