Ҡайҙа эш табыуы еңелерәк: төбәктә һөнәри өлкәләр исемлеге төҙөлдө

ӨФӨ, 2017 йыл, 5 декабрь. /«Башинформ» мәғлүмәт агентлығы, Галина Бахшиева/. HeadHunter эш һәм хеҙмәткәрҙәр эҙләү порталы Башҡортостандағы вакансияларҙы һәм резюмеларҙы тикшереп, эш табыуы еңелерәк булған 5 һөнәри өлкәнең исемлеген төҙөгән.

«Тикшеренеү барышында асыҡланыуынса, йыл аҙағына бер вакансияға конкурс 6,6 резюмеға еткән. Был эш эҙләүселәр араһында конкуренцияның юғары булыуы хаҡында һөйләй: кандидаттарға эш табыуға ҡарағанда, эш биреүсегә хеҙмәткәр табыуы еңелерәк. Башҡортостанда «Консультация биреү» һәм «Страховкалау» (бер тәҡдимгә 0,7 резюме тура килә), «Инсталляция һәм сервис» (1,3), «Эшсе персонал» (1,9) һәм «Автомобиль бизнесы» (2) өлкәләрендә эш табыуы еңелерәк, — тине HeadHunter Башҡортостан порталының матбуғат хеҙмәте етәксеһе Ольга Ғибәҙуллина. — «Дәүләт хеҙмәте» (бер урынға 17,3 дәғүәсе), «Сеймал табыу» (17,2), «Бухгалтерия, идара итеү иҫәбе» (10,3), «Юристар» (10,3) һәм «Карьераны башлау, студенттар» (10,3) тармағында эш эҙләгән кандидаттарға ауырғараҡ төшә.