Башҡортостан һәм Өфө яңылыҡтары
92.26
-0.33
99.71
-0.56
86.97
-0.03
-4 °C
Ҡар
Бөтә яңылыҡтар
Иҡтисад
15 Ноябрь 2017, 12:14

Төбәктең Хеҙмәт министрлығы уртаса эш хаҡын атаны

ӨФӨ, 2017 йыл, 15 ноябрь. /«Башинформ» мәғлүмәт агентлығы, Галина Бахшиева/. Башҡортостандың Хеҙмәт министрлығы мәғлүмәте буйынса, август айында төбәктә уртаса хеҙмәт хаҡы 30 187 һум тәшкил итте.
Октябрҙә республикала эшһеҙлек буйынса пособиеның уртаса күләме 4175 һум булды. Эшкә һәләтле халыҡ өсөн йәшәү минимумы 9498 һум күләмендә билдәләнгән.
2017 йылдың өсөнсө кварталында эшсе көстәрҙе һайланма тикшереү мәғлүмәттәренә ярашлы, Башҡортостанда иҡтисади яҡтан әүҙем халыҡ һаны 2,051 миллион кешегә етә. Иҡтисадта мәшғүлдәр һаны — 1,940 миллион кеше. Эшһеҙҙәрҙең дөйөм һаны 111 меңдән ашыу.
Дөйөм эшһеҙлек кимәле 5,4 процентҡа тиң. Ил буйынса был күрһәткес 5 процент тәшкил итә, Волга буйы федераль округында иһә 4,5 процент.
«Известия» гәзите хәбәр итеүенсә, ағымдағы йылдың ғинуар-август айҙарында Мәскәүҙә уртаса айлыҡ хеҙмәт хаҡы 2016 йылдың ошо уҡ осоро менән сағыштырғанда 8,5 процентҡа артып, 91 815 һум тәшкил итте. Мосгорстат ошондай мәғлүмәттәр килтерә.
Статистикала кесе эшҡыуарлыҡ субъекттарына ҡарамаған бөтә милек формаһындағы предприятие, учреждение һәм ойошмалар хеҙмәткәрҙәренең эш хаҡы иҫәпкә алына.
Ошо ваҡыт эсендә йән башына иҫәпләгәндә айлыҡ аҡсалата килем 2,8 процентҡа артып, 56 700 һум тәшкил иткән.
Росстат хәбәр итеүенсә, Рәсәйҙә инфляцияның ике тапҡырҙан ашыуға кәмеүе (4,1-ҙән 1,7 процентҡа тиклем) иҫәбенә реаль эш хаҡы 2,5 процентҡа артҡан.
Читайте нас: