Республика агропредприятиелары биогаз өлкәһендәге проектты ғәмәлгә ашырырға ниәтләй

ӨФӨ, 2017 йыл, 15 ноябрь. /«Башинформ» мәғлүмәт агентлығы/. Дәүләкән районына эш сәфәре барышында Башҡортостан Башлығы Рөстәм Хәмитов һөт һәм ит етештереү, бөртөклө һәм техник культуралар үҫтереү менән шөғөлләнеүсе «Регион-Агро» яуаплылығы сикләнгән йәмғиәтендә булды.

Ленинск ауылында урынлашҡан ауыл хужалығы предприятиеһы «500 ферма» республика маҡсатлы программаһында әүҙем ҡатнашты. Уның сиктәрендә ике һыйыр аҙбары, профилакторий менән быҙау аҙбары, һыйыр һауыу бүлеге яңыртылды, силос соҡоро төҙөлдө. Малсылыҡ объекттарында бер нисә яңы ҡарар ҡулланылҫан. Мәҫәлән: һыйыр аҙбарҙары «аҡыллы» елләтеү системаһы менән йыһазландырылған, ул һауа ағымын һәм температураһын һауа шарттарына һәм йыл миҙгеленә генә түгел, мал башына, уңышына, ауырлығына ҡарап билдәләй.

- Афариндар! Бик яҡшы тәьҫораттар ҡалды, – тине Рөстәм Хәмитов.

«Регион-Агро» йәмғиәте етәксеһе Вадим Нуриәхмәтов «500 ферма» программаһын юғары баһаланы, республика ярҙамынан тыш был проектты тормошҡа ашырып булмаҫын билдәләп.

Етештереү күләмен арттырыу маҡсатында әлеге ваҡытта предприятиела 8,5 миллион күләмендә һум капитал һалыу менән 350 баш мал һыйышлы һимертеү майҙансығы төҙөлә. 25 миллион һумлыҡ 170 баш һауым һыйыр һыйышлы аҙбар төҙөлә башлаған.

Республика Башлығы аграрийҙар менән етештереүҙе диверсификациялау, шәкәр сөгөлдөрө, етен, крамбе кеүек техник культураларҙы сәсеү майҙандарын арттырыу, һөт эшкәртеүҙе һәм сыр етештереүҙе ойоштороу мәсьәләләрен тикшерҙе.

Вадим Нуриәхмәтов һүҙҙәренсә, «Регион-Агро» шулай уҡ биогаз өлкәһендәге проектты ғәмәлгә ашырырға ниәтләй. Рөстәм Хәмитов был идеяны хупланы.

- Һеҙ башлағыҙ, ә беҙ ярҙам итербеҙ, яҡшы итеп субсидияларбыҙ. Һеҙҙең ҡалғандарға быны нисек эшләргә мөмкин һәм кәрәк икәнлеген күрһәтеүегеҙ мөһим, – тине Рөстәм Хәмитов. – Эшләгәс тә шылтыратығыҙ, мин шунда уҡ килермен.