Башҡортостан сауҙа ассоциацияһын Фәрит Ғиндуллин етәкләне

ӨФӨ, 2017 йыл, 27 октябрь. /«Башинформ» мәғлүмәт агентлығы, Ольга Мортазина/. «АиФ» яуаплылығы сикләнгән йәмғиәте хужаһы Фәрит Ғиндуллин Башҡортостан сауҙа ассоциацияһының яңы етәксеһе итеп һайланды. 26 октябрҙә ассоциация ағзаларының дөйөм йыйылышы булды, унда, ҡайтанан һайлауҙарҙан тыш, ойошманың эш һөҙөмтәләре һәм төбәк ритейлының көнүҙәк проблемалары тикшерелде.

Башҡортостан сауҙа ассоциацияһының элекке етәксеһе – «Форвард» ябыҡ акционерҙар йәмғиәте (компания «Байрам», «Полушка», «Һабантуй» селтәрҙәре менән идара итә) директоры Павел Антипин республиканың Сауҙа буйынса дәүләт комитетынан маҡтау грамотаһы менән бүләкләнде. Башҡортостан сауҙа ассоциацияһы – Дәүләт комитеты менән тығыҙ эшләгән берҙән-бер йәмәғәт ойошмаһы, ә «Байрам» селтәре бешмә ауырыуынан зыян күргән ауылдарға беренселәрҙән булып тиҙ арала гуманитар ярҙам күрһәтеүгә яуап бирҙе, тип билдәләне ведомство етәксеһе Гүзәл Аҫылова.

Яңы рәйескә дәғүәсене эшҡыуар һәм Башҡортостан Дәүләт Йыйылышы – Ҡоролтай депутаты Илдар Ғарифуллин таныштырҙы. Фәрит Ғиндуллин, үҙ сиратында, 2018 йылдың аҙағына тиклем ойошма эшенең киң программаһы менән таныштырҙы. Уға эшҡыуарҙарға мотлаҡ электрон программаларға инеү тураһында яңы закондар буйынса мәғлүмәт һәм кәңәш биреү инә. Проект шулай уҡ йәмәғәт тормошонда, конкурстарҙа һәм күргәҙмәләрҙә ҡатнашыуҙы күҙ уңында тота.