Республика көнөнә Шаран йылғаһы аша күпер төҙөлдө

ӨФӨ, 2017 йыл, 10 октябрь. /«Башинформ» мәғлүмәт агентлығы, Әлим Фәйезов/. Республиканың Шаран районында Шаран йылғаһы аша яңыртылған күперҙе асыу тантанаһы үтте. Иҫке күпер авария хәлендә ине. Шаран ауылының төньяҡ биҫтәһенә, райондың административ үҙәгенә башҡа күпер юҡ ине, бөтәһе лә урау юл буйлап йөрөнө һәм түҙемһеҙлек менән был яҡҡа хәрәкәттең асылыуын көттө. Ремонт эштәрен быйыл «Дормост» яуаплылығы сикләнгән йәмғиәте башланы һәм кисә уны тантаналы рәүештә астылар.

Республика көнөнә бындай бүләкте бөтә юл хәрәкәте ҡатнашыусылары ла баһаланы – күпергә тигеҙ итеп асфальт түшәлгән, бер етешһеҙлеге лә юҡ, йәйәүлеләр өсөн айырым юл бүленгән, яҡтыртылған.

Тантанала Шаран районы хакимиәте башлығы Илгиз Сәмиғуллин, «Башҡортостан Республикаһы юл хужалығы идаралығы» дәүләт ҡаҙна учреждениеһы урынбаҫары Азат Хафизов, «Дормост» яуаплылығы сикләнгән йәмғиәте директоры Ростом Аракелян ҡатнашты.

Район башлығы «Дормост» йәмғиәте директоры һәм участка мастерына сифатлы башҡарылған эш һәм күперҙе ваҡытынан алда файҙаланыуға тапшырғандары өсөн рәхмәт әйтеп, уларға Рәхмәт хаттарын тапшырҙы.

Тантаналы асыуҙан һуң күпер буйлап «Башкиравтодор» акционерҙар йәмғиәте автомашиналары колоннаһы үтте. Урау юл киләһе йылдарҙа ла һаҡланасаҡ, тип хәбәр иттеләр муниципалитет хакимиәтендә.