Башҡортостанда пенсия түләүҙәренә 15 миллиард һумдан ашыу аҡса йүнәлтелгән

ӨФӨ, 2017 йыл, 4 сентябрь. /«Башинформ» мәғлүмәт агентлығы, Ғәлиә Нәбиева/. Башҡортостанда ағымдағы йылдың авгусы өсөн эшләгән пенсионерҙарҙың страховка пенсиялары күләмен яңынан иҫәпләүҙе иҫәпкә алып, пенсия түләүҙәренә 15 миллиард 810 миллион һум йүнәлтелгән. Республика йәйҙең һуңғы айы өсөн Пенсия фонды тормошҡа ашырған бөтә түләүҙәрҙе тамамланы. Рәсәй Пенсия фонды идараһы ағзаһы, Башҡортостан Республикаһы идарасы Фоат Хантимеров ошо хаҡта һөйләне.

Республикала 1 миллион 169 мең кешегә пенсия түләнә, 328 меңе федераль льготаға эйә, 140 меңе федераль социаль өҫтәмә түләү ала. Пенсия һәм социаль түләү алыусыларҙың 41, 6 процентын — Рәсәй почтаһы, 58 процентын — кредит ойошмалары, 0,4 процентын башҡа ойошмалар хеҙмәтләндерә.