Республикала һөттөң төп өлөшөн урта фермерҙар бирә

ӨФӨ, 2017 йыл, 28 август. /«Башинформ» мәғлүмәт агентлығы, Ольга Мортазина/. Башҡортостанда 2016 йылда 930 ферма 1,73 миллион тонна һөт етештергән, был илдә иң яҡшы һөҙөмтәләрҙең береһе. Ошо хаҡта «Һөт иле» фестивале сиктәрендә ойошторолған һәм һөт сәнәғәтенә арналған түңәрәк өҫтәлдә һөйләнеләр. Рәсәй дөйөм һөт етештереү күләмдәрендә республиканың өлөшө – 5,6 процент, Волга буйы федераль округында – 18,4 процент. Һәр баш һыйырҙан уртаса һауым 4 896 килограмм (2015 йылға ҡарағанда артым 111 процент).

Республиканың ауыл хужалығы предприятиелары һәм крәҫтиән-фермер хужалыҡтары 708 мең тонна һөт етештергән. Дөйөм алғанда, продукттың төп өлөшөн 400 баш малға тиклем бәләкәй һәм урта фермерҙар бирә – 75 процент. Эре малсылыҡ комплекстары (800 баш малдан) 3 процент етештерә. Әммә нәҡ һуңғыларында ҙур һөҙөмтә өлгәшелгән. Эре фермаларҙағы малдар күп продукт бирә: һәр һыйыр йылына уртаса 8 мең килограмм самаһы һөт бирә.