Башҡортостан төҙөүселәре үҙҙәренең һөнәри байрамын билдәләй

ӨФӨ, 2017 йыл, 10 август. /«Башинформ» мәғлүмәт агентлығы, Әлим Фәйезов/. Кесе йома, 10 августа Башҡортостан төҙөүселәре үҙенең һөнәри байрамын билдәләй.

Көндөң тәүге яртыһында тармаҡтың иң яҡшы вәкилдәренә дәүләт наградаларын тапшырыу тантанаһы үтә.

Төҙөүселәр көнөнә арналған тантаналы йыйылыш көндөҙгө сәғәт 3-тә Конгресс-холда башлана. Бында 2016 йылдың йомғаҡтары буйынса «Рәсәй төҙөлөш комплексының иң яҡшы ойошмаһы» исеменә ХХI Бөтә Рәсәй конкурсы, шулай уҡ 2017 йылдың тәүге ярты йыллығында иң яҡшы төҙөлөш ойошмаһы, төҙөлөш материалдары һәм төҙөләш индустрияһы предприятиеһы, проект ойошмаһы конкурсы лауреаттарына дипломдар, Башҡортостан Республикаһының Төҙөлөш һәм архитектура буйынса дәүләт комитетының маҡтау ҡағыҙҙары тапшырыласаҡ.

Йыйылышта ҡатнашыусылар өсөн республиканың сәнғәт оҫталары байрам концертын ҡуя.

Рәсәйҙә Төҙөүселәр көнө августың икенсе йәкшәмбеһендә билдәләнә – 2017 йылда ул 13 авгусҡа тура килә.

Тәүге тапҡыр СССР заманында Төҙөүселәр көнө 1956 йылдың 12 авгусында билдәләнгән.

Һөнәри Төҙөүселәр көнөн байрам итеү 1980 йылдың 1 октябрендә Юғары Совет Президиумының «Байрам һәм иҫтәлекле көндәр тураһында»ғы указы менән нығытылған.

Рәсәй Федерацияһы Төбәктәрҙе үҫтереү министрлығының ҡарары буйынса 2011 йылдан байрам федераль статус алған.