Төбәктә миллионерҙар артҡан

ӨФӨ, 2017 йыл, 3 август. /«Башинформ» мәғлүмәт агентлығы, Әлим Фәйезов/. Башҡортостандың Һалым хеҙмәте идаралығы 2016 йылға декларация компанияһының йомғаҡтарын баҫып сығарҙы. Физик берәмектәрҙән бөтәһе 200 мең самаһы табыш тураһында отчет ҡабул ителгән. Төп өлөшө, йәғни отчет биреүселәрҙең 90 проценты бер йылда уларҙың килем суммаһы бер миллион һумдан артмауын белдергән. Әйтеп үтергә кәрәк, былтыр ҙур булмаған эш хаҡы менән һалым түләүселәрҙең өлөшө 3 проценттан артманы, тип хәбәр итә РБК-Өфө.

20 меңләп кеше йылына 1-10 миллион һум аҡса эшләй алыуы хаҡында хәбәр итте. Сағыштырыу өсөн, 2015 йылдың йомғаҡтары буйынса миллионерҙарҙың һаны байтаҡҡа әҙерәк – 13 мең булған.

«Йылдан-йыл 10 миллион һумдан юғары табыш күрһәтелгән декларацияларҙың иҫәбе арта, — тип өҫтәнеләр Федераль һалым хеҙмәтенең Башҡортостан буйынса идаралығы матбуғат хеҙмәтендә. – 2015 йылда бындай табышты 505 һалым түләүсе теркәһә, 2016-сыла – 555».

Миллиардерҙар һаны берәүгә кәмегән: һигеҙ ине, хәҙер ете. 2015 йылда миллиардлы табышлы ике кеше ҡиммәтле ҡағыҙҙар менән уңышлы операциялар хаҡында белдергән. Былтыр, отчеттар буйынса, бизнесмендар ҙур аҡсаны эшҡыуарлыҡ эшмәкәрлегендә генә эшләй алған.