Республикала 3,5 мең өлөшсөгә хәүеф янай

ӨФӨ, 2017 йыл, 25 июль. /«Башинформ» мәғлүмәт агентлығы, Ольга Мортазина/. Башҡортостанда төҙөлөштә өлөшләтә ҡатнашҡан 3,5 мең кешегә хәүеф янай. Өс мең өлөшсөнөң проблемаһы йорттарҙы тапшырыу ваҡытын һуҙыуға ҡайтып ҡала, ләкин 500-600 самаһы кеше мутлашыусыларҙан зыян күргән. Был хаҡта республика башлығы Рөстәм Хәмитов 24 июлдә республика телеканалдарына биргән интервьюһы барышында хәбәр итте.

«Өс мең граждан буйынса хәл ҡатмарлы, әммә хәл итергә мөмкин. Төҙөлөш тамамланыр һәм улар торлаҡ алыр. Ҡануниәтебеҙгә өҫтәмә норматив акттар, төҙәтмәләр ҡабул итергә кәрәк, — тип аңлатма бирҙе башлыҡ. — Һалған аҡсалары урланған 500-600 кешегә килгәндә, бында хәл ҡатмарлыраҡ, сөнки ошо мәсьәләне туранан-тура хәл итеү юлы юҡ. Ләкин шул уҡ ваҡытта унда ла алданған өлөшсөләр өсөн уңайлы варианттар табырға тырышырбыҙ. Миңә мутлашыусылар ҡулына эләккән яҡташтарыбыҙ, граждандарыбыҙ бик йәл. Һис шикһеҙ, мин дә улар кеүек борсолам. Ғәйептең бер өлөшөн ваҡытында ниҙер эшләп еткермәгән хөкүмәткә, ошондай ваҡиғаларға юл ҡуйған ҡала хакимиәттәренә, муниципалитеттарға япһарам».

Башлыҡ көн һайын проблемалы объекттар хаҡында мәғлүмәт менән танышып барыуын билдәләне. «Эштең әүҙемләшеүен әйтеп үтергә кәрәк. Төҙөлөш буйынса дәүләт комитеты һәм хөкүмәт был темаға ҙур иғтибар бирә һәм бөгөнгә тейешле саралар күрелгән дә инде», — тине Рөстәм Хәмитов.