Әлшәй районының һигеҙ ҡасабаһында «Реаль эштәр» башҡарыла

ӨФӨ, 2017 йыл, 24 июль. /«Башинформ» мәғлүмәт агентлығы, Ольга Мортазина/. Әлшәй районындағы һигеҙ ҡасабала «Реаль эштәр» партия проекты тормошҡа ашырыла. Улар араһында — Ҡырым, Уразмәт һәм Никифарово ауылдарында юлдарға асфальт түшәү һәм клубтарҙы төҙөкләндереү, Ҡыпсаҡ-Асҡар ауылында мәктәптең ҡоймаһын, Зеленый Клин ауылында иһә һыу үткәргесте ремонтлау. Раевкала Ленин исемендәге паркты төҙөкләндереү районда масштаблы проекттарҙың береһе булмаҡсы. Бөгөнгә Яңы Сәпәш ауылындағы балалар баҡсаһы ҡоймаһын ремонтлау буйынса эштәр тамамланған да инде.

«Әле бөтә аукциондар ҙа тиерлек үткәрелгән, подрядсылар менән килешеүҙәр төҙөлгән. Һәр ваҡыттағыса беҙ район халҡының наказдарын үтәү өсөн депутаттар менән тығыҙ хеҙмәттәшлек итәбеҙ. Әлшәйҙә төҙөкләндереү буйынса проекттарға ярҙам итеү өсөн республика ҡаҙнаһынан 2,85 миллион һум бүленгән», — тип хәбәр итте «Берҙәм Рәсәй»ҙең урындағы башҡарма комитеты етәксеһе Раиса Козловская.