Бөрөлә 14 ихатала «Ҡала мөхитен булдырыу» проекты тормошҡа ашырыла

ӨФӨ, 2017 йыл, 19 июль. /«Башинформ» мәғлүмәт агентлығы, Ольга Мортазина/. Бөрөлә «Заманса ҡала мөхитен булдырыу» проектын ғәмәлгә ашырыу башланды. 25 күп фатирлы йортта йәшәүселәр файҙаланған 14 ихатала һәм Еңеү паркында төҙөкләндереү эштәре күҙаллана. Ошо хаҡта республика хөкүмәтенең матбуғат хеҙмәтендә хәбәр иттеләр. Был объекттар ҡала халҡының 43 ғаризаһынан һайлап алынған. Улар ремонттың суммаһынан 5% йыйып, проектта ҡатнашырға тейеш. Эштәрҙең минималь исемлегенә ихаталарҙы ремонтлау, яҡтыртҡыстар, эскәмйәләр, урналар ҡуйыу инә.

Ағымдағы йылда республикала 354 ихатаны (604 йортто) һәм 35 йәмәғәт биләмәһен төҙөкләндереү ҡарала. 2018 йылдан проектта меңдән ашыу кеше йәшәгән бөтә тораҡ пункттар ҡатнаша ала.