Башҡортостанда ауыл биләмәләрен үҫтереү буйынса бөтә Рәсәй кәңәшмәһе үтәсәк

ӨФӨ, 2017 йыл, 13 июль. /«Башинформ» мәғлүмәт агентлығы, Галина Бахшиева/. 19-21 июлдә Башҡортостанда «Бәләкәй хужалыҡ формаларына дәүләт ярҙамы һәм ауыл хужалығы биләмәләренең тотороҡло үҫеше» III бөтә Рәсәй семинар-кәңәшмәһе үтә.

«Башинформ» агентлығында уҙған матбуғат конференцияһында республиканың ауыл хужалығы министры Илшат Фәзрәхманов хәбәр итеүенсә, Башҡортостанға илдең яҡынса 60 төбәге вәкилдәре киләсәк. Дөйөм алғанда, 400-ләгән кеше.

Улар араһында – Рәсәй субъекттарының агросәнәғәт комплекстары менән идара итеү органдары етәкселәре, муниципалитет, ауыл биләмәһе һәм крәҫтиән (фермер) хужалыҡтары башлыҡтары.

Сарала ҡатнашыусылар Илеш, Дүртөйлө, Бүздәк һәм Туймазы райондарында «2014-2017 йылдарға һәм 2020 йылға тиклем осорҙа ауыл биләмәләренең тотороҡло үҫеше» федераль маҡсатлы программаһы һәм «Бәләкәй хужалыҡ формаларына ярҙам итеү» программаһы сиктәрендә дәүләт ярҙамын алған агросәнәғәт комплексы, социаль һәм инженер инфрструктураһы объекттарында буласаҡ. Бынан тыш, ауыл хужалығы продукцияһын етештереү һәм эшкәртеү объекттарын ҡараясаҡ.

Пленар ултырыш Өфөнөң Конгресс-холл бинаһында 21 июлгә билдәләнгән.