Башҡортостан Хөкүмәте «Башавтотранс» ДУП-һын финанс яҡтан сәләмәтләндереү буйынса саралар күрә

ӨФӨ, 2017 йыл, 7 июль. /«Башинформ» мәғлүмәт агентлығы,Ксения Калинина/. Башҡортостан Хөкүмәте «Башавтотранс» ДУП-һы эшмәкәрлеген финанс яҡтан сәләмәтләндереү һәм ярҙам итеү буйынса саралар күрә. Генераль директор вазифаһын башҡарыусы итеп дәүләт секторында эш тәжрибәһен иҫәпкә алып, Рәзим Мәхийәнов тәғәйенләнгән. Тәғәйенләү предприятие менән идара итеүҙе яҡшыртыу, финанс-хужалыҡ эшмәкәрлек һәм хеҙмәткәрҙәргә эш хаҡын ваҡытында түләү һөҙөмтәләре өсөн етәксенең яуаплылығын арттырыу, предприятиеның етештереү активтарын үҙәкләштереү һәм иҡтисади үҫтереү өсөн шарттар булдырыу кәрәклеге менән билдәләнгән. Ҡабул ителәсәк сараларҙың төп маҡсаты – предприятиеның профилен һаҡлап ҡалыу һәм Башҡортостан халҡына пассажирҙар ташыу өлкәһендә күрһәтелгән хеҙмәттәрҙең сифатын арттырыу ул. Ошо хаҡта «Башинформ» агентлығына Башҡортостан Хөкүмәтендә хәбәр иттеләр.

Рәзим Зәғит улы Мәхийәнов «Башавтотранс» ДУП-һының генераль директоры вазифаһын башҡарыусы итеп 2017 йылдың 4 июлендә конкурс процедураларын уҙғарыу осорона тәғәйенләнде.

Ул Бишбүләк районының Ҡыңғыр-Мәнәүез ауылында тыуған. 2008 йылда – Ырымбур дәүләт институтын, 2012 йылда – «Дәүләт һәм муниципаль идара итеү» һөнәре буйынса Башҡортостан дәүләт хеҙмәте һәм идара итеү академияһын тамамлай.

Төрлө ваҡытта коммерциялы һәм дәүләт предприятиеларында етәксе вазифаларын биләй.