Башҡортостан башлығы ҡатнашлығынан һуң ағас ташыусы транспорт өсөн Вознесенка – Саруа юлы ябылды

ӨФӨ, 2017 йыл, 7 июль. /«Башинформ» мәғлүмәт агентлығы, Ольга Мортазина/. Нуриман районында 15 саҡрымлыҡ Вознесенка — Саруа грунт юлын төҙөкләндереү мәсьәләһе хәл ителә. Ошо көндәрҙә алыҫтағы Саруа ауылында йәшәүселәр үҙҙәре өсөн берҙән-бер юлды емергән ағас ташыусыларға юлды япты. Был хаҡта республика башлығы кесаҙна Дәүләт Йыйылышы ултырышында иҫкә төшөрөп, Башҡортостандың Транспорт һәм юл хужалығы буйынса дәүләт комитетына мәсьәләне яйға һалырға ҡушты.

Ведомствола аңлатыуҙарынса, әлеге юл 2016 йылдың көҙөнән ремонтлана башлаған, әммә ҙур йөк машиналары уның менән файҙаланыуын дауам итә. Вице-премьер Ильяс Мөниров шул уҡ көндә объектҡа юлланды һәм Саруа халҡы менән осрашты. «Ремонтлау мәлендә йөк машиналары өсөн юлды ябырға ҡарар ителде. Юлды 1 авгусҡа тиклем нормаға ярашлы хәлгә килтереү күҙаллана. Халыҡ өсөн ҡасабанан ҡаршылыҡһыҙ сығыу өсөн транспорт ойошторолған», — тип хәбәр иттеләр Башҡортостандың Транспорт һәм юл хужалығы буйынса дәүләт комитетында.

Ильяс Мөниров Башҡортостандың Юл хужалығы идаралығына һәм проектлау институттарына тейешле юл билдәләрен ҡуйыу өсөн юлға һәм күпергә рөхсәт ителгән ауырлыҡты билдәләргә ҡушты.