Башҡортостан Башлығы Өфөлә ШОС һәм БРИКС илдәре төбәктәренең III бәләкәй эшҡыуарлыҡ форумын уҙғарыу тураһындағы бойороҡҡа ҡул ҡуйҙы

ӨФӨ, 2017 йыл, 30 июнь. /«Башинформ» мәғлүмәт агентлығы, Галина Бахшиева/. Шанхай хеҙмәттәшлек ойошмаһы һәм БРИКС илдәре-ҡатнашыусылары төбәктәренең эшҡыуарҙары араһында хеҙмәттәшлекте үҫтереүгә шарттар булдырыу өсөн ағымдағы йылдың 27-29 сентябрендә Өфөлә Рәсәй Федерацияһы һәм сит ил дәүләттәре субъекттарының рәсми делегациялары ҡатнашлығында ШОС һәм БРИКС илдәре-ҡатнашыусылары төбәктәренең III бәләкәй эшҡыуарлыҡ форумы үтә. Тейешле бойороҡҡа Башҡортостан Башлығы Рөстәм Хәмитов ҡул ҡуйҙы. Ошо хаҡта төбәк хөкүмәтенең матбуғат хеҙмәте хәбәр итә.

Форумды уҙғарыу илдәр араһында сауҙа әйләнешен арттырыуға, үҙ-ара инвестициялар йәлеп итеүгә, ШОС һәм БРИКС илдәренең сауҙа-иҡтисади бәйләнештәрен үҫтереүгә ҡамасаулаған ҡаршылыҡтарҙы бөтөрөүгә йүнәлтелгән.

Сентябрҙә үтәсәк форумда ШОС һәм БРИКС илдәренең экспорт уйымдары һәм перспективалы баҙарҙары, төбәк проекттарын финанслау механизмы аша бәләкәй эшҡыуарлыҡты үҫтереү, ШОС сиктәрендә ирекле сауҙа зоналарын булдырыу, мегапроекттарҙы тормошҡа ашырыуҙа бәләкәй һәм урта эшҡыуарлыҡтың роле кеүек темалар тикшереләсәк.