Октябрьский урындағы башланғыстарға булышлыҡ итеү өсөн 2,4 миллион һум аҡса аласаҡ

ӨФӨ, 2017 йыл, 23 июнь. /«Башинформ» мәғлүмәт агентлығы, Дарья Петрова/. Октябрьский ҡалаһы урындағы башланғыстарға булышлыҡ итеү программаһы буйынса Башҡортостан ҡаҙнаһынан 2,4 миллион һум аҡса аласаҡ. Бер миллион һум ҡалаға Шокуров урамындағы юлды төҙөкләндереү өсөн бүленгән, 715 мең һум 3-сө гимназияның биләмәһендә урынлашҡан спорт майҙансығын капиталь ремонтлауға йүнәлтелә. Тағы 692,8 мең һумды 13-сө мәктәптә тәҙрәләр ҡуйыу өсөн тотоноу ҡаралған.

«Беҙ ҡала халҡының мөрәжәғәттәре буйынса, әһәмиәтле ғаризаларҙы һайлап эшләргә тырышабыҙ, — ти Октябрьский хакимиәте башлығының йәшәйеште тәьмин итеү мәсьәләләре буйынса урынбаҫары Шамил Фәррәхов. — Былтыр урындағы башланғыстарға булышлыҡ итеү программаһына ярашлы Спутник биҫтәһендәге юлға асфальт түшәнек».

Төбәктә урындағы башланғыстарға булышлыҡ итеү программаһы 2016 йылда эшләй башлағайны. Урындағы халыҡ финанслау талап иткән киҫкен проблемаларҙы үҙҙәре билдәләй, ҡағиҙә булараҡ, улар биләмәләрҙе төҙөкләндереүгә, юлдарҙы ремонтлауға, яҡтыртыуға, коммуникацияларға ҡағыла. Проекттарҙы тормошҡа ашырыу өсөн аҡса конкурс нигеҙендә бүленә.