Республика коммуналь инфраструктураны яңыртыу буйынса Стратегик башланғыстар агентлығы программаһына инде

ӨФӨ, 2017 йыл, 22 июнь. /«Башинформ» мәғлүмәт агентлығы, Ғәлиә Нәбиева/. Башҡортостан коммуналь инфраструктураны яңыртыу буйынса Стратегик башланғыстар агентлығы программаһына инде. XXI Петербург халыҡ-ара иҡтисади форумы барышында төбәк хөкүмәте һәм Яңы проекттарҙы үҫтереү буйынса стратегик башланғыстар агентлығы араһында ике яҡлы килешеү төҙөлдө. Документҡа Башҡортостан Башлығы Рөстәм Хәмитов һәм Стратегик башланғыстар агентлығы етәксеһе Светлана Чупшева ҡул ҡуйҙы.

Килешеү ярҙамында республика биләмәһендә торлаҡ-коммуналь хужалыҡ өлкәһендә уңышлы тәжрибәләр индереләсәк. Был эш Стратегик башланғыстар агентлығының «Дөрөҫ ҡарарҙар магазины» проекты сиктәрендә уҙғарыласаҡ.

Килешеүгә ярашлы, төбәктә файҙаланыу өсөн яраҡһыҙ тип танылған лифттарҙы алмаштырыу буйынса саралар ғәмәлгә ашырыласаҡ. Республиканың Торлаҡ-коммуналь хужалыҡ министрлығы мәғлүмәттәре буйынса, билдәләнгән сараларҙы 2020 йылға тамамлау күҙаллана.