Майҙа республикала сәнәғәт етештереүе индексы 106,5% тәшкил итте

ӨФӨ, 2017 йыл, 20 июнь. /«Башинформ» мәғлүмәт агентлығы, Ольга Мортазина/. Башҡортостанстат мәғлүмәттәренә ярашлы, республикала сәнәғәт етештереүе индексы майҙа уҙған йылдың майына ҡарата 106,5%, ғинуар-май өсөн 2016 йылдың ғинуар-майына ҡарата 103,4% тәшкил итте. Илдәге уртаса күрһәткес: 2016 йылдың майына – 105,6%, ғинуар-майҙа – үткән йылдың ғинуар-майына ҡарата 101,7%. Волга буйы федераль округы төбәктәре буйынса сәнәғәт етештереүе индексы Удмуртияла 92,1% алып Мордовияла 111,4% тиклем.

Түбәндәге производстволар Башҡортостанда индекстың динамикаһына ыңғай йоғонто яһаны: ҡағыҙ һәм ҡағыҙ изделиелар (2016 йылдың ғинуар майына 1,8 тапҡыр), транспорт саралары һәм ҡорамалдар (128,9%), мебель (125,9%), компьютер, электрон һәм оптик изделиелар (119,4%), туҡыма әйберҙәр (117,0%), электр ҡорамалдары, әҙер металл изделиелар, башҡа файҙалы ҡаҙылмалар табыу (116,1-116,8%), химик матдәләр һәм химик продукттар, күн һәм күн әйберҙәр, эсемлектәр (111,1-111,8%), ағас эшкәртеү һәм ағас әйберҙәр (110,6%).

Бынан тыш, кейем-һалым, аҙыҡ-түлек, әҙер изделиелар, башҡа металл булмаған минераль продукттар етештереүҙә продукция сығарыу күләмен 2016 йылдың ғинуар-майына 3,1-5,5% үҫтереү билдәләнгән.

Дарыуҙар етештереүҙә – 1,7 тапҡырға (2016 йылдың ғинуар-майына ҡарата), металл рудалар сығарыуҙа – 11,9%, автотранспорт саралары, тағылма һәм ярымтағылмалар етештереүҙә, металлургия производствоһында – 7,2-9,8%, нефть продукттары, полиграфия эшмәкәрлеге һәм күсермә яһауҙа, резина һәм пластмасса әйберҙәр, машиналар һәм ҡорамалдар етештереүҙә 0,9-1,4% артта ҡалыу күҙәтелә.

Сәнәғәт етештереүе индексы — сәнәғәт етештереүе күләме динамикаһы, уның артыу йәки кәмеү күрһәткесе. Ул сәнәғәт продукцияһының мөһим төрҙәре булараҡ күрһәтелгән тауарҙарҙы һайлап алыу юлы менән билдәләнә.