Төбәктә алты район мал аҙығы әҙерләүгә тотондо

ӨФӨ, 2017 йыл, 16 июнь. /«Башинформ» мәғлүмәт агентлығы, Ольга Мортазина/. Башҡортостандағы алты район хужалыҡтарында бесән һәм сенаж әҙерләү өсөн күп йыллыҡ үләндәрҙе сабыу башланды. Республика Ауыл хужалығы министрлығының үҫемлекселек һәм мал аҙығы әҙерләү бүлеге мәғлүмәттәре буйынса, тәүгеләрҙән булып эшкә Дүртөйлөнөң «Ленин исемендәге», «Вәлиев исемендәге», «Еңеү», «Рәсәй» тоҡомсолоҡ заводтары, Баҡалының «Михайловское», «Бозор» ауыл хужалығы предприятиелары, Мәләүез районының «Ашҡаҙар» ауыл хужалығы етештереү кооперативы, Стәрлетамаҡтың Калинин исемендәге агросәнәғәт предприятиеһы яуаплылығы сикләнгән йәмғиәте, Хәйбулланың Власенко һәм Погорелов крәҫтиән-фермер хужалыҡтары, Яңауыл районының «АгроМ» яуаплылығы сикләнгән йәмғиәте төштө. 15 июнгә ҡарата мәғлүмәттәр буйынса, эштәр 840 гектар ерҙә башҡарылған.