Төбәктә яҙғы сәсеү оптималь ваҡытта тамамланды

ӨФӨ, 2017 йыл, 15 июнь. /«Башинформ» мәғлүмәт агентлығы, Ольга Мортазина/. Башҡортостанда сәсеү кампанияһына йомғаҡ яһалды. Республиканың Ауыл хужалығы министрлығында хәбәр итеүҙәренсә, яҙғы сәсеү һауа шарттары арҡаһында ғәҙәттәгенән ике аҙнаға һуңыраҡ башланһа ла, оптималь агротехник срокта үткәрелде. Быйыл яҙ сәсеү эштәре 2,2 миллион гектарҙа башҡарылды. Уның структураһында 67% – бөртөклөләр һәм ҡуҙаҡлыларға, 10,7% – көнбағышҡа, 2,4% – шәкәр сөгөлдөрөнә, 4,7% – картуф һәм йәшелсәгә, 11,6% мал аҙығы культураларына тура килә.

«Эксперттар фекеренсә, төбәктә сифатлы мал аҙығы әҙерләү өсөн ҡулай ваҡыт етте: ҡуҙаҡлыларҙың — сәскә ата, ҡыяҡлыларҙың башаҡлана башлаған мәле», — тип хәбәр иттеләр Ауыл хужалығы министрлығында. Әле Стәрлетамаҡ һәм Мәләүез райондары мал аҙығы әҙерләүгә төшкән.

Киләһе уңышҡа килгәндә, быйыл көҙ 700 мең гектарҙан кәм булмаған майҙанда ужым культураларын сәсеү күҙаллана. Ошо йылда ужым ашлыҡтарының торошо күпкә яҡшыраҡ, сөнки улар нигеҙҙә пар баҫыуҙарында сәселгән. «Таҙа парҙар — теләһә ниндәй йылда тотороҡло уңыш гаранты, шуға күрә урындарҙа һәр пар баҫыуын контролгә алыу һәм үлән үҫеүгә юл ҡуймау бурысы тора», — тип хәбәр иттеләр ведомствоның матбуғат хеҙмәтендә.