Өфөлә 1-се мәктәпте төҙөкләндереү бара

ӨФӨ, 2017 йыл, 15 июнь. /«Башинформ» мәғлүмәт агентлығы, Ольга Мортазина/. Өфөлә Мостай Кәрим урамында урынлашҡан 1-се мәктәпте төҙөкләндереү бара. Төҙөлөш эштәре уҡыу йылы тамамланғас та башланды. Ике ҡатлы бина 1951 йылда һалынған, 1968 йылда иһә уға биш ҡатлы корпус һәм спорт залы төҙөлгән. 2009 йылда беренсе бина авариялы тип танылды һәм шунан бирле уҡыу процесында файҙаланылманы, тип иҫкә төшөрҙөләр мэрияла. Уның урынында — дүрт ҡатлы корпус төҙөү, биш ҡатлыһында реконструкция үткәреү ҡаралған. Мәктәптә 775 бала белем аласаҡ, әлегеһенә ҡарағанда ике тапҡырға күберәк. Был ҡаланың әүҙем үҫешеүе һәм халыҡтың артыуы менән бәйле бик актуаль.

Эштәрҙе 2018 йылдың декабренә тамамлау планлаштырыла. Уға тиклем балалар 2-се лицейҙың бинаһында уҡыясаҡ.