Өфөлә Көнсығыш сығыу юлын төҙөүҙе БРИКС-тың Яңы үҫеш банкы кредитлай

ӨФӨ, 2017 йыл, 6 июнь. /«Башинформ» мәғлүмәт агентлығы, Ольга Мортазина/. Өфөлә Көнсығыш сығыу юлын төҙөүҙе (М7 һәм М5 трассаларын тоташтырасаҡ) БРИКС-тың Яңы үҫеш банкы кредитлай. Шул рәүешле ул Башҡортостан хөкүмәтенең 4,5 миллиард һумлыҡ өлөшөн индерә. 1 июндә Петербург халыҡ-ара иҡтисади форумында республика властары ВТБ банкының бүлендек структураһы — «Башҡортостандың концессия компанияһы» менән юл һалыуға килешеү төҙөнө.

Банк вәкилдәре Өфөләге тоннелде — 25 йыл буйына төҙөлөш алып барылмаған һәм проектҡа йәлеп ителгән объектты килеп ҡараны. Юлды һәм тоннелде дүрт йыл дауамында төҙөү планлаштырыла, инвестицияларҙың дөйөм күләме — 29 миллиард һумға яҡын, концессия срогы — 25 йыл.

Бынан тыш, БРИКС-тың Яңы үҫеш банкы республика юл инфраструктураһының тағы ла ике объектына — Бөрө һәм Нефтекама урау юлдарына ҡыҙыҡһыныу белдерҙе, тип хәбәр иттеләр Башҡортостандың Төҙөлөш һәм архитектура буйынса дәүләт комитетында.