Өфөлә «Башҡортостандың иң яҡшы тауарҙары» конкурсы еңеүселәрен бүләкләйәсәктәр

ӨФӨ, 2017 йыл, 2 июнь. /«Башинформ» мәғлүмәт агентлығы, Галина Бахшиева/. Өфөлә 2 июндә «Башҡортостандың иң яҡшы тауарҙары» республика конкурсы – «Рәсәйҙең иң яҡшы 100 тауары» программаһының бөтә Рәсәй конкурсының төбәк этабы еңеүселәрен бүләкләү тантанаһы үтә.

Конкурстың төп бурыстары – иң яҡшы тауар һәм хеҙмәт өлгөләрен билдәләү, сифат өлкәһендә илебеҙ предприятиелары һәм ойошмалараның ыңғай тәжрибәһен танытыу, сифат менеджментының һөҙөмтәле системаларын индереүгә булышлыҡ итеү.

Конкурс Башҡортостан Республикаһы Хөкүмәте, республиканың Сәнәғәт һәм инновация сәйәсәте министрлығы, Иҡтисади үҫеш министрлығы, «Стандартлаштырыу, метрология һәм һынау үҙәге» федераль бюджет учреждениеһы, Сифат проблемалары академияһының Башҡортостан төбәк бүлексәһе һәм республиканың Сауҙа-сәнәғәт палатаһы тарафынан уҙғарыла.

Ойоштороусылар хәбәр итеүенсә, конкурсҡа тәҡдим ителгән материалдарҙы ҡарағандан һуң республикалағы 57 предприятиеның 108 төр продукцияһы һәм хеҙмәте конкурс лауреаты исеменә лайыҡ булды. Улар үҙ продукцияһын «Башҡортостандың иң яҡшы тауарҙары» логотипы менән билдәләү хоҡуғына эйә булды. Төбәк этабын уңышлы үткәндәрҙең федераль кимәлдә – «Рәсәйҙең иң яҡшы 100 тауары» программаһында үҙе хаҡында белдереү мөмкинлеге бар.