Башҡортостан Инвестиция мөхите торошоноң милли рейтингында тәүге 15 иҫәбенә инде

ӨФӨ, 2017 йыл, 2 июнь. /«Башинформ» мәғлүмәт агентлығы, Ольга Мортазина/. Башҡортостан өсөнсө йыл рәттән Инвестиция мөхите торошоноң милли рейтингында үҙ позицияларын яҡшырта. 2 июндә Петербург халыҡ-ара иҡтисади форумында 2016 йыл өсөн Рәсәй төбәктәре буйынса һөҙөмтәләр иғлан ителде. Башҡортостан, 13-сө урынды биләп һәм элекке күрһәткестәрен һиҙелерлек яҡшыртып, лидерҙар төркөмөнә инде. Стратегик башланғыстар агентлығында хәбәр итеүҙәренсә, республика ете баҫҡысҡа күтәрелеп, инвестиция мөхитен булдырыуҙа алға табан ҙур аҙым яһаны. Был төбәктә эштең ойошҡанлы алып барылыуы хаҡында һөйләй.

«Көйләүсе мөхит», «Бизнес өсөн институттар», «Инфраструктура һәм ресурстар», «Бәләкәй эшҡыуарлыҡҡа ярҙам итеү» йүнәлештәре сиктәрендә 45 күрһәткес буйынса баһаланған. Милли рейтинг бизнес-берләшмәләрҙең фекеренә нигеҙләнгән.

2015 йылдан Петербург халыҡ-ара иҡтисади форумы ил төбәктәрендә инвестиция мөхите торошоноң милли рейтингы һөҙөмтәләре менән таныштырыу майҙансығы булып тора. Ошо ваҡыт эсендә Милли рейтинг төбәктәрҙә бизнесты алып барыу шарттарын яҡшыртыу буйынса бөтә кимәлдәге властарҙың тырышлығын баһалауҙа үҙенең һөҙөмтәлелеген раҫланы, уның йомғаҡтары иһә төбәк кимәлендә инвестициялар өсөн көрәштә конкуренцияны арттыра, тип билдәләнеләр республика хөкүмәтендә.