Бәләбәй ҡала быуаһын төҙөкләндереүгә 4,7 миллион һум аласаҡ

ӨФӨ, 2017 йыл, 31 май. /«Башинформ» мәғлүмәт агентлығы/. Башҡортостанда «Заманса ҡала мөхитен булдырыу» өҫтөнлөклө проектын тормошҡа ашырыу дауам итә. Мәҫәлән, Бәләбәйҙә хакимиәт сайтында быйыл төҙөкләндереләсәк күмәк ял итеү урынын һайлау буйынса тауыш биреү уҙҙы. 60 мең кеше йәшәгән Бәләбәйҙә 38,8 меңдән ашыуы ял итеү урыны булараҡ киң билдәле ҡала быуаһы биләмәһен төҙөкләндереү өсөн тауыш биргән. Бөгөн биләмә инфраструктураларҙың булмауы сәбәпле йәмһеҙ күренә. Проект сиктәрендә бында велосипед юлын һалыу, балалар майҙансығын һәм воркаут менән шөғөлләнеү өсөн спорт ҡорамалдарын ҡуйыу күҙалланған.

Төҙөкләндереүгә 4,7 миллион һум бүленгән, уларҙың 3,9 миллионы – федераль ҡаҙнанан, тип хәтергә төшөрҙөләр Башҡортостан Хөкүмәтенең матбуғат хеҙмәтендә. Республика Министрҙар кабинетының ҡарары менән 250 мең кеше йәшәгән ҡалаларҙа ҡала парктарын төҙөкләндереүгә ярҙам итеү өсөн республика бюджетынан субсидиялар бүлеү ҡаралған. 2017 йылда ошо маҡсаттарға бөтәһе 22,6 миллион һум, шул иҫәптән федераль ҡаҙнанан 18,8 миллион һум бүлеү күҙалланған.