Башҡортостан һәм Өфө яңылыҡтары
92.59
+0.02
100.27
-0.14
85.78
+0.37
1+ °C
Ҡар
Бөтә яңылыҡтар
Иҡтисад
30 Май 2017, 13:16

Баш ҡалала «Шифахана-2017» Бөтә Рәсәй форумы бара

Олег Яровиков
Олег Яровиков
ӨФӨ, 2017 йыл, 30 май. /«Башинформ» мәғлүмәт агентлығы, Ольга Мортазина/. Өфөләге Конгресс-холда «Шифахана-2017» Бөтә Рәсәй форумы бара. Башҡортостандың баш ҡалаһы уны икенсе тапҡыр ҡабул итә. Форумда ҡатнашыусыларҙы һәм ҡунаҡтарҙы республика башлығы Рөстәм Хәмитов сәләмләне. Ул төбәктә туристик тармаҡты үҫтереү хаҡында һөйләне һәм йыйылыусыларҙың барыһын да урындағы шифаханаларҙа ял итергә саҡырҙы. Шулай уҡ Башҡортостан башлығы дәүләт-шәхси партнерлыҡ һөҙөмтәһендә «Красноусол» шифаханаһының 300 миллион һум инвестиция аласағын хәбәр итте. Аҡса 130 урынлыҡ яңы корпус төҙөүгә йүнәлтелә.
Туризм буйынса федераль агентлыҡ етәксеһе Олег Сафонов совет заманында ойошторолған шифахана-һауыҡтырыу комплексының уникаль һәм донъяла аналогы булмауын билдәләне. Унда ял итеү, дауаланыу, профилактикалау берләштерелгән. «Ошо йәһәттән Рәсәйҙең конкуренттары юҡлығын барыһы ла таный. Шуға күрә тармаҡтың киләсәге ҙур. Әлеге ваҡытта тулайым эске продуктта туризмдың өлөшө — 3,4%. Бурысыбыҙ — 10% еткереү», — тип хәбәр итте «Ростуризм» башлығы.
Милли курорт ассоциацияһы президенты, академик Александр Разумов «Сәләмәт кешенең һаулығын һаҡлау — Рәсәйҙең социаль-иҡтисади үҫешенең һәм милли хәүефһеҙлектең нигеҙе» тигән доклад менән сығыш яһаны.
Форумдың һәм махсуслаштырылған күргәҙмәнең эше өс көнгә иҫәпләнгән. Докладтар тематикаһында медицина реабилитацияһы темаһы өҫтөнлөк итә.
Форум алдынан республика буйлап өс көнлөк матбуғат туры ойошторолдо, ул урындағы курорттар буйлап таныштырыу сәфәре менән тамамлана.
Читайте нас: