Башҡортостан Ер һөрөү буйынса Рәсәй чемпионатын уҙғарыуға яуаплы ҡараны - эксперт

ӨФӨ, 2017 йыл, 25 май. /«Башинформ» мәғлүмәт агентлығы, Галина Бахшиева/. 25 июндән алып 1 июлгә ҡәҙәр Өфө районында уҙасаҡ Ер һөрөү буйынса Асыҡ Рәсәй чемпионатына төрлө агротехнология варианттары менән 60 төр ауыл хужалығы культуралары һәм 20 гибриды буйынса тәржрибә сәсеүлектәре тулыһынса әҙер. Яҡын ваҡыт эсендә сәсеүлектәр эшкәртеләсәк, тип хәбәр иттеләр Башҡортостан Ауыл хужалығы министрлығының матбуғат хеҙмәтендә.

«Башинформ» агентлығы хәбәр иткәнсә, Ер һөрөү буйынса Рәсәй чемпионаты Башҡортостанда тәүгә уҙғарыла. «Росагролизинг» компанияһы һәм Башҡортостан хөкүмәте уның ойоштороусылары булып сығыш яһай. Чемпионаттың баш кураторы – «Росагролизинг» акционерҙар йәмғиәте генераль директорының беренсе урынбаҫары Людмила Приданованың әйтеүе буйынса, төбәк алдағы игенселәр ярышын ойоштороуға яуаплы килде. Бөтә саралар ҙа графикка ярашлы бара.

Чемпионатты үткәреү барышында эшлекле һәм мәҙәни программалар көтөлә. Улар араһында – «Трактор-шоу», өр-яңы ауыл хужалығы техникалары күргәҙмәһе, «Тере ферма» һәм «Башҡортостандың милли ихатаһы» павильондарының эше.