Рәсәй һәм Төркиә сауҙала булған сикләүҙәрҙе бөтөрҙө

ӨФӨ, 2017 йыл, 23 май. /«Башинформ» мәғлүмәт агентлығы, Ольга Мортазина/. Рәсәй һәм Төркиә сауҙала булған сикләүҙәрҙе бөтөрҙө, тип хәбәр итә «Известия» гәзите. Ике дәүләт вице-премьерҙары Аркадий Дворкович һәм Мехмет Шимшек Рәсәй һәм Төркиә араһында санкцияларҙы бөтөрөү хаҡындағы уртаҡ белдереүгә ҡул ҡуйҙы. Документҡа ҡул ҡуйыу тантанаһында Рәсәй хөкүмәте премьер-министры Дмитрий Медведев һәм Төркиә хакимиәте башлығы Бинали Йылдырым булды.

Рәсәй хөкүмәтенең матбуғат хеҙмәтендә алдан белдереүҙәренсә, Дмитрий Медведев үҙенең Истанбулға Ҡара диңгеҙ иҡтисади хеҙмәттәшлек ойошмаһы саммитына сәфәре барышында Төркиә президенты Рәжәп Тайып Эрдоган менән килешеүҙәр уҙғарырға тейеш. Рәсәй хөкүмәте башлығы һәм Төркиә лидеры ике яҡлы мөнәсәбәттәрҙең төп мәсьәләләрен, Сүриәләге хәлде, шулай уҡ башҡа халыҡ-ара проблемаларҙы тикшерәсәк.