Баш ҡалала «Башҡортостан аҙыҡ-түлеге» проектын үҫтереүҙе тикшерәләр

ӨФӨ, 2017 йыл, 19 май. /«Башинформ» мәғлүмәт агентлығы, Ольга Мортазина/. Өфөлә 19 майҙа түңәрәк өҫтәлдә «Башҡортостан аҙыҡ-түлеге» проектын үҫтереүҙе тикшерәләр. Унда Башҡортостандың Сауҙа һәм ҡулланыусылар хоҡуғын яҡлау буйынса дәүләт комитеты, Сәнәғәт һәм инновация сәйәсәте министрлығы, республиканың еңел сәнәғәт предприятиелары ассоциацияһы вәкилдәре ҡатнаша.

«Башҡортостан аҙыҡ-түлеге» бренды 2013 йылда барлыҡҡа килде. Тауарға ҡуйылған билдә ошо продукттың республика биләмәһендә етештерелеүен, лабораторияла сифат буйынса тикшереү үтеүен, технологик һәм санитар талаптарға яуап биреүен аңлата. Бөгөн 240-тан ашыу етештереүсе 2100-гә яҡын аҙыҡ төрөндә ошо билдәне файҙалана. Йыл башында брендты аҙыҡ-түлеккә генә түгел, шулай уҡ туҡыманан һәм күндән эшләнгән изделиеларға, халыҡ кәсептәре продукцияһына ҡуйырға күҙаллауҙары хаҡында хәбәр ителгәйне.