ӨФӨ, 2017 йыл, 15 май. /«Башинформ» мәғлүмәт агентлығы/. 12 майҙа төбәк етәксеһе Рөстәм Хәмитов үткәргән Башҡортостан Башлығы ҡарамағындағы Инвестиция мөхитен яҡшыртыу буйынса йәмәғәт советы ултырышында республикала бәләкәй һәм урта эшҡыуарлыҡ субъекттарына милек менән ярҙам итеү саралары тикшерелде.
Уҙған йыл йомғаҡтары буйынса Башҡортостан – дәүләт-шәхси партнерлыҡты үҫтереү буйынса алдынғылар иҫәбендә, тип билдәләне төбәк Башлығы.
- Республикала инвестиция мөхите торошона йәмәғәтселек баһаһы йомғаҡтары буйынса ла беҙ яҡшы һөҙөмтәләргә эйә. Дөйөм алғанда, инвестиция эшмәкәрлеге беҙҙә әлегә һәйбәт үҫешә, – тине Рөстәм Хәмитов. – Тимәк, нығырыҡ көс һалырға, тырышып эшләргә кәрәк. Атҡара алмаҫлыҡ нәмәләр юҡ. Был эшкә ныҡлап, күмәкләп тотонһаҡ, һуңғы ике-өс йылдағы кеүек үк ошолай дауам итһәк, һөҙөмтәләр яҡшы буласағына инандыҡ.
Башҡортостан Премьер-министры урынбаҫары – республиканың ер һәм мөлкәт мөнәсәбәттәре министры Евгений Гурьев бәләкәй һәм урта эшҡыуарлыҡ субъекттарына милек менән ярҙам итеү саралары хаҡында һөйләне.
Атап әйткәндә, төбәк Башлығының йөкләмәһе буйынса 2017 йылдың аҙағына тиклем ер участкаларын уларҙың кадастр хаҡынан 50 процент күләмендә льготалы һатып алыу ваҡыты оҙайтылған. Ике йыл эсендә республикала 4 меңдән ашыу ер участкаһы һатып алынған. Хәҙерге динамиканы иҫәпкә алып, ошо сараны 2018 йылдың аҙағына тиклем оҙайтырға тәҡдим ителгән.
Тағы ла бер ярҙам йүнәлеше – төп бурысты ҡаплағанда ҡуртымға түләүҙе ваҡытында түләмәгән өсөн пеняларҙы иҫәптән сығарыу. 2016 йылдан бурыслылар 140 миллион һум пеняларҙы иҫәптән сығарыу хоҡуғын алыу өсөн республиканың тупланма ҡаҙнаһына 211 миллион һум күләмендә төп бурысты ҡаплаған. Евгений Гурьев билдәләүенсә, 2017 йылдың тәүге ярты йыллығында иҫәпләнгән пеняларҙың 75 процентын һәм икенсе ярты йыллыҡта 50 процентты иҫәптән сығарырға мөмкин.
Вице-премьер әйтеүенсә, мөрәжәғәттәрҙең байтаҡ өлөшө күсемһеҙ милек объекттарын ҡуртымға биреү буйынса дәүләт ярҙамына ҡағыла.
Башҡортостан Ер һәм мөлкәт мөнәсәбәттәре министрлығының рәсми сайтында бәләкәй эшҡыуарлыҡ субъекттарына ҡуртымға биреү өсөн тәҡдим ителгән буш майҙансыҡтар һәм дәүләт, муниципаль сектор предприятиеларының ҡеүәттәре тураһында мәғлүмәттәр баҫыла.
- Документтар ҡабул итәбеҙ, ташламалар индерәбеҙ, бәләкәй эшҡыуарлыҡҡа ярҙам итеү йүнәлеше буйынса эш алып барабыҙ, ә ул киңәймәй, беҙгә кәрәкле кимәлдә үҫешмәй, – тине Рөстәм Хәмитов.
Башҡортостандың Сауҙа-сәнәғәт палатаһы президенты Азат Фазлыев фекеренсә, төп проблема ҡабул ителгән ҡарарҙарҙы муниципаль кимәлдә башҡарыуға ҡайтып ҡала. Эшҡыуарҙар урындарҙа ер менән идара итеүҙә артыҡ бюрократия менән осраша. Мәсьәләләрҙе хәл итеү оҙаҡҡа һуҙыла, суд процестарына ҡәҙәр барып етә.
- Муниципалитет башлыҡтарының ошо йәһәттән үҙ агрументтары барҙыр, – тип билдәләне Рөстәм Хәмитов, Башҡортостан Хөкүмәтенә республиканың Сауҙа-сәнәғәт палатаһы һәм Муниципаль берәмектәр советы менән берлектә урындағы кимәлдәге хәлде тикшерергә ҡушып.
