Башҡортостанға нефть һәм газ химияһын үҫтереү бурысы тора — Фәрхәд Самедов

ӨФӨ, 2017 йыл, 11 май. /«Башинформ» мәғлүмәт агентлығы, Ольга Мортазина/. 23-26 майҙа Өфөлә Рәсәй нефть-газ химияһы форумы һәм «Газ. Нефть. Технологиялар-2017» халыҡ-ара күргәҙмәһе ойошторола. Унда Рәсәйҙең 40 төбәгенән һәм 20-гә яҡын сит илдән компаниялар ҡатнаша. Ҡатнашыусыларҙың 80 проценты — етештереүсе предприятиелар, тип билдәләне Башҡортостан хөкүмәте премьер-министры урынбаҫары Фәрхәд Самедов. Пленар өлөштә илдең нефть һәм химия сәнәғәтен үҫтереү проблемаларын тикшереү ҡаралған. «Табыу, беренсел эшкәртеү йәһәтенән алдынғы урынды биләйбеҙ. Маҡсатыбыҙ — нефть һәм газ химияһы өлкәһендә лә ошондай күрһәткестәргә өлгәшеү», — тине вице-премьер.

Форум һәм «Газ. Нефть. Технологиялар» күргәҙмәһе Өфөлә 25-се тапҡыр үткәрелә. Эшлекле майҙансыҡта ҡатламды һыу ярҙамында емереү технологияһын булдырыу, газ-мотор яғыулығы мәсьәләләре тикшереләсәк. Экспозицияла ҡатнашыусылар алдынғы технологиялар һәм яңы ҡорамалдар менән таныштырасаҡ.