Туймазы районында 19 ғаилә 18 миллион һумлыҡ торлаҡ сертификаттарына эйә булды

ӨФӨ, 2017 йыл, 26 апрель. /«Башинформ» мәғлүмәт агентлығы, Ольга Мортазина/. Туймазы районында тағы ла 19 ғаиләгә торлаҡ һатып алыу йәки төҙөү өсөн дөйөм суммаһы 18 миллион һумлыҡ таныҡлыҡ тапшырылды, тип хәбәр иттеләр муниципалитетта. Былтыр ҙа агросәнәғәт комплексы һәм социаль өлкәлә эшләгән 19 ғаиләгә дәүләт ярҙам күрһәтелгән. Биш йыл эсендә Туймазыла «Ауыл биләмәләрен тотороҡло үҫтереү» федераль маҡсатлы программаһында ҡатнашҡан 100 ғаилә субсидия алған.

2013 йылдан алып ошо программаны тормошҡа ашырыу барышында Райман ауылында 277 участкаға, Нөркәй, Кендек-Тамаҡ ауылдарының өс урамына газ үткәрелгән; Горный ауылы, Япрыҡ ауылының өс урамы, Илсембәт ауылының Таулы урамы һыу менән тәьмин ителгән; Түбәнге Троицк, Ҡандра, Собханғол, Иҫке Собханғол ауылдарында һыу үткәргес һалынған.

2014 йылдан алып әлеге программа сиктәрендә районда «Дуҫлыҡ ауылын комплекслы төҙөү һәм төҙөкләндереү» объекты һалына. Әлеге көндә 500 участкалыҡ ер массивында электр, газ, һыу менән тәьмин итеү селтәре төҙөлгән. 60 урынлыҡ балалар баҡсаһын төҙөү тамамлана, физкультура-һауыҡтырыу комплексы сафҡа индерелә.