250-нән ашыу тауар етештереүсе үҙ продукцияһына «Башҡортостан аҙыҡ-түлеге» билдәһен ҡуйырға рөхсәт алды

ӨФӨ, 2017 йыл, 12 апрель. /«Башинформ» мәғлүмәт агентлығы, Галина Бахшиева/. Республиканың 250-нән ашыу тауар етештереүсеһе үҙ продукцияһына «Башҡортостан аҙыҡ-түлеге» билдәһен ҡуйырға рөхсәт алды. Ике мең самаһы аҙыҡ-түлек исемлеге урындағы сифат билдәһенә лайыҡ.

«Башҡортостан аҙыҡ-түлеге» проекты 2013 йылда башланды. Республиканың урындағы сеймалда эшләүсе предприятиелары ғына үҙ продукцияһына ошо билдәне ҡуя ала. Белдерелгән тауарҙарҙы «Һынау үҙәге» бойондороҡһоҙ лабораторияһында баһалайҙар. Экспертиза уңышлы үткәндә аҙыҡ-түлеккә тауар билдәһе бирелә. Экспертизаны өс ай һайын ҡабатларға кәрәк. Һынау барышында кәмселектәр асыҡланһа, етештереүсегә хәлде төҙәтеү өсөн тейешле кәңәштәр бирелә.

«Башҡортостан аҙыҡ-түлеге» билдәһен ҡуйыуға рөхсәт алған тауарҙарҙың тулы исемлеге проекттың рәсми сайтында урынлаштырылған. Һатып алыусы уның алдында кәрәкле бөтә рөхсәттәрҙе алған «дөрөҫ» ризыҡ икәнлеген еңел генә тикшерә ала.