Төбәктә бал ҡорттарының күпләп һәләк булыуына яңы вирус инфекцияһы сәбәпсе булыуы ихтимал

ӨФӨ, 2017 йыл, 11 апрель. /«Башинформ» мәғлүмәт агентлығы, Галина Бахшиева/. Башҡортостанда бал ҡорттарының күпләп һәләк булыуы билдәләнә, тип белдерҙе республиканың Умартасылыҡ продукцияһын етештереүселәр һәм эшкәртеүселәр ассоциацияһы вице-президенты Сергей Мөлөков.

«26 район — 160 умартасы буйынса мәғлүмәт бар. Һәләк булыу 80-90 процент тәшкил итә. Алтайҙа, Ырымбур, Һамар өлкәләрендә һәм Адыгейҙа ошоға оҡшаш хәл күҙәтелә», — тип хәбәр итте ул Facebook социаль селтәрендә.

Бал ҡорттарының күпләп һәләк булыуына билдәһеҙ вирус инфекцияһы сәбәпсе булыуы ихтимал.

«Әле Томск, Мәскәү, шулай Германия һәм Франция лабораторияларына ебәреү өсөн һәләк булған бал ҡорттарының өлгөләрен һайлап алырға әҙерләнәбеҙ, — тип хәбәр итте ул РБК-Өфө сайтына. — Беҙ Ставрополь крайының тәжрибәһен өйрәндек. Өс йыл элек унда ла шундай хәл булғайны. Улар бал ҡорттарын Европа лабораторияларында тикшерҙе һәм инфекцияны ҡуҙғытыусыны асыҡланы. Европала етештерелгән препараттар тәҡдим ителде. Улар барыһын да дауалай алды. Бәлки, ошо юлдан китергәлер».

Сергей Мөлөков һүҙҙәренсә, популяция бер миҙгелдә тергеҙеләсәк. Шуға ҡарамаҫтан, проблема ҡала, ул хөкүмәт кимәлендә хәл итеүҙе талап итә.

Уның фекеренсә, ветеринар тикшеренеүҙәр үткәрергә, сирҙәрҙе һәм ҡуҙғытыусыларҙы өйрәнергә, препараттар әҙерләргә, яңы ҡорамалдар кәрәк.