Башҡортостан һәм Өфө яңылыҡтары
69.59
+0.26
75.78
+0.37
83.79
-0.71
-7 °C
Болотло
Бөтә яңылыҡтар
Иҡтисад
11 Апрель 2017, 08:52

Башҡортостанда быйыл төҙөкләндереләсәк юл участкалары аталды

Олег Яровиков
Олег Яровиков
ӨФӨ, 2017 йыл, 11 апрель. /«Башинформ» мәғлүмәт агентлығы, Галина Бахшиева/. Башҡортостан халҡы төбәк, муниципаль-ара һәм урындағы юлдарҙы төҙөкләндереү исемлеге менән таныша ала.
Объекттарҙа эштәрҙе башҡарыу карта-схемаһы Башҡортостандың Транспорт һәм юл хужалығы буйынса дәүләт комитеты сайтында урынлаштырылған.
Быйыл мең саҡрым самаһы төбәк, муниципаль-ара һәм урындағы юлдарҙы ремонтлау күҙаллана. Ул былтырғыға ҡарағанда 150 саҡрымға күберәк.
Шул иҫәптән 442 саҡрым оҙонлоҡтағы төбәк, муниципаль-ара тәғәйенләнештәге һәм 468 саҡрым урындағы юл участкаларында ремонт эштәрен тамамлау билдәләнгән. Улар Башҡортостан Юл фондынан субсидиялар иҫәбенә финанслана.
Бынан тыш, һәр муниципалитеттың үҙ юл фонды бар, улар иҫәбенә лә урындағы тәғәйенләнештәге автомобиль юлдарын төҙөкләндереү буйынса эштәр уҙғарыла.
Муниципалитеттарҙың юл фонды нефть продукттарына һалынған акциздарҙан, республика ҡаҙнаһынан бүленгән субсидияларҙан һәм башҡа сығанаҡтарҙан килгән аҡсанан тора, тип аңлаттылар республиканың Транспорт һәм юл хужалығы буйынса дәүләт комитетының матбуғат хеҙмәтендә.
«Быйыл юлдарҙы төҙөкләндереү буйынса пландар бик ҙур. Хәҙер төҙөүсе ойошмалар тулы көстә инерт материалдар әҙерләй, көндәр йылытыу менән бөтә республика буйлап юлдар ремонтлана башлай», — тип билдәләне Башҡортостандың Транспорт һәм юл хужалығы буйынса дәүләт комитеты рәйесе Рим Ғиләжетдинов.
Төҙөкләндереләсәк юлдарҙың оҙонлоғон, шул иҫәптән «һуңлап түләү» механизмын ҡулланып, арттырыу күҙаллана.
2016 йылда ошо яңы түләү схемаһын ҡулланып, юл хеҙмәткәрҙәренең аҡсаларын индереү иҫәбенә эштәрҙе тиҙерәк башҡарып булды. Шул схема буйынса төбәк һәм муниципаль-ара тәғәйенләнештәге 126 саҡрым мөһим автомобиль юлдары йүнәтелде.
Автор:Галина Бахшиева
Читайте нас в