Өфөлә икенсел баҙарҙа фатирҙың уртаса хаҡы тағы ла биш процентҡа төштө

ӨФӨ, 2017 йыл, 5 апрель. /«Башинформ» мәғлүмәт агентлығы, Ольга Мортазина/. Өфөлә торлаҡ арзанайыуын дауам итә. «Фатирҙар донъяһы» федераль порталы мәғлүмәттәренә ярашлы, беренсе квартал йомғаҡтары буйынса баш ҡалала «икенсел» фатирҙың уртаса хаҡы биш процентҡа кәмене һәм хәҙер 3,42 миллион һум самаһы тәшкил итә. Өфө 69 ҡала (300 меңдән ашыу кеше йәшәгән) ингән исемлектә (торлаҡтың хаҡы буйынса) 20 урынды биләй. Икенсел баҙарҙа квадрат метрҙың хаҡы — 58 631 һум, 4,6 процентҡа төшкән.

Рейтингтағы 69 ҡаланың 33-дә ике күрһәткестең дә кәмеүе теркәлгән. Был хаҡтарҙың төшөүе тураһында фекер йөрөтөргә нигеҙ бирә, һәм ағымдағы иҡтисади хәлдә баҙарҙың тиҙ генә йәнләнеүенә иҫәп тоторға ярамай, тип йомғаҡ яһай эксперттар.

Мәскәүҙә икенсел торлаҡ арзанайыуын (фатирҙың уртаса хаҡы 11,78 миллион һум — -1,2 процент) һәм Санкт-Петербургта ҡиммәтләнеүен (фатирҙың уртаса хаҡы 7,3 миллион— +3,3 процент) дауам итә. Яңы йорттар баҙары буйынса беренсе квартал йомғаҡтарын бында ҡарағыҙ.