Башҡортостан яңы еңел автомобилдәр һатыу рейтингында алтынсы урынды билдәй

ӨФӨ, 2017 йыл, 3 апрель./ «Башинформ» мәғлүмәт агентлығы /. Башҡортостан яңы еңел автомобилдәр һатыу буйынса ҙур төбәк баҙарҙарының рейтингында алтынсы урында тора. Йылдың тәүге ике айына йомғаҡ яһап, был исемлекте «Автостат» аналитика агентлығы белгестәре әҙерләгән, тип хәбәр итә РБК-Өфө.

Уҙған йыл менән сағыштырғанда республикала баҙар күләме 7,7 процентҡа артҡан һәм 5,8 мең автомобилгә еткән. Шул рәүешле, бөтә яңы еңел автомобилдәр һатыуҙан төбәк өлөшөнә 3,6 процент тура килә.

Белгестәр иң ҙур үҫеште Пермь крайында билдәләгән – плюс 13,3 процент; иң насар хәл – Мәскәүҙә, бында ике ай йомғаҡтары буйынса баҙар күләме 20 процентҡа кәмегән. Шул уҡ ваҡытта Рәсәйҙең баш ҡалаһы илдә иң ҙур төбәк баҙары булып ҡала: бында 25 меңдән ашыу автомобиль һатылған, ул бөтөн баҙарҙың 15,7 процентын тәшкил итә. Артабан Мәскәү өлкәһе (13,7 мең данаға тиклем +3,7 процент) һәм Санкт-Петербург (10,8 мең, -3,7%;) килә. Һуңынан исемлектә Татарстан (8 меңдән ашыу, +9,1 %), Краснодар крайы (6,3 мең дана; -2,4%) тора.