Күмертауҙа Рәсәйҙең көс структураларын карап вертолеттары менән тәьмин итеү буйынса дәүләт заказы үтәлде

ӨФӨ, 2017 йыл, 30 март. /«Башинформ» мәғлүмәт агентлығы, Артем Вәлиев/. 30 мартта Күмертау авиация етештереү предприятиеһының осоу-һынау майҙансығында ике Ка-226Т заманса вертолеты һынау үтте һәм дәүләт заказы буйынса махсус тәғәйенләнештәге авиация өсөн Рәсәйҙең көс структураларына тапшырылды. Ҡанаттары винт рәүешендә өйөрөлөп торған вертолеттар карапҡа ултырыу өсөн яһалған. Вертолеттың компоненттары агрессив диңгеҙ мөхите шарттарында эшләүгә яраҡлашҡан.

Ҙур булмаған вертолеттар еңел ауырлыҡтағы караптарҙа урынлаша ала. Улар конструкцияның модулле булыуы менән айырылып тора, шуға күрә бер тоннаға тиклем йөк ташыу, транспорт кабинаһын ҡуйғанда алты пассажир йөрөтөү өсөн ҡулайлаша ала.

«Ка-226Т вертолеттарын етештергәндә файҙаланылған хәҙерге конструктор ҡарарҙары ошо вертолет башҡара аласаҡ тактик бурыстар даирәһен ярайһы уҡ киңәйтергә мөмкинлек бирә, — ти «Рәсәй вертолеттары» холдингының генераль директоры Андрей Богинский. — Машина яҡшы маневр яһай белеүе һәм идара ителеше менән айырылып тора, ҡулланылышта ябай. Беҙ Рәсәйҙә һәм сит илдәрҙә караптар өсөн еңел вертолеттарға һорауҙың ҙур булыуын күҙәтәбеҙ».

Күрһәтмә осоштар башҡарғанда яңы вертолеттар бер нисә түңәрәк яһаны, һәм, көндөң елле булыуына ҡарамаҫтан, һынаусылар юғары пилотаж фигуралары элементтарын күрһәтте. Бынан тыш, журналистарҙы яңы Ка-32 вертолеты менән таныштырҙылар. Уны Ҡытай компанияһы һатып алған. Ул — донъяла вертолеттарҙың ошо моделен һатып алған алтынсы шәхси компания. Мәҫәлән, Антарктидала ошондай уҡ вертолет йөк тейәү-бушатыуҙа эшләй, төрлө илдәрҙәге Рәсәй Ғәҙәттән тыш хәлдәр министрлығы кеүек дәүләт ойошмалары 100-гә яҡын вертолет менән тәьмин ителгән.