Баш ҡалала «Өфө-Ладья» һөнәрҙәр фестивале сиктәрендә тултырма бешерергә өйрәттеләр

ӨФӨ, 2017 йыл, 30 март. /«Башинформ» мәғлүмәт агентлығы, Ольга Мортазина/. 29 мартта Өфөлә «Өфө-Ладья» һөнәрҙәр фестивале асылды. Уның барышында милли аш-һыу фестивале уҙҙы, унда баш ҡаланың башҡорт, рус, япон, грузин, үзбәк һәм башҡа милли аш-һыу тәҡдим иткән 10 рестораны ҡатнашты.

Өфөнөң аш-һыу оҫталары милли ашамлыҡтар бешереү буйынса оҫталыҡ дәрестәре уҙғарҙы. Балалар диетик туҡланыу үҙәге директоры урынбаҫары Розалиә Сәхибгәрәева үпкә-бауыр менән ярманан тултырма эшләп күрһәтте. Ул эслектәрҙең үҙенсәлекле рецебын, тышлыҡҡа тултырыу һәм ризыҡты бешереү алымын аңлатты.

«Башҡортостан – элек-электән малсылыҡ төбәге. Малдың эсәк, үпкә-бауырҙары йыш ҡына артып ҡалыусан, уларҙы файҙаланыу алымын табыу ҙа еңелдән түгел. Мәҫәлән, үпкәне бешереп тә, ҡурып та булмай, бөйөрөккә лә күп китмәй. Шунан тултырманы уйлап тапҡандар, унда эсәккә үпкә-бауырҙан эшләнгән фарш менән бергә ҡарабойҙай йәки арпа ярмаһын тултырғандар һәм бынамын тигән ит ашамлығы килеп сыҡҡан», — тип һөйләне аш-һыу оҫтаһы.