Башҡортостанда урман сәнәғәте кластеры ойошторола

ӨФӨ, 2017 йыл, 22 март. /«Башинформ» мәғлүмәт агентлығы, Ольга Мортазина/. Башҡортостанда урман сәнәғәте кластеры ойошторола. 22 мартта Рәсәй сәнәғәт форумы барышында Килешеү төҙөлдө. Документҡа сәнәғәт һәм инновация сәйәсәте министры Алексей Карпухин, төбәктә эшләгән ун ағас әҙерләү һәм эшкәртеү предприятиелары етәкселәре ҡул ҡуйҙы. Килешеү эшҡыуарлыҡты берлектә үҫтереү һәм идара итеүсе компания булдырыуҙы күҙ уңында тота. Уның сиктәрендә Әмзә урман комбинатында, «Башлеспром», «Сибайлеспром», «Селена»ла яңы етештереү ҡеүәттәрен төҙөү ҡаралған.

«Кластер ҙур һәм бәләкәй предприятиеларҙың бергә тупланыуын күҙ уңында тота. Был булған ресурстарҙы һөҙөмтәлерәк файҙаланырға мөмкинлек бирәсәк», — тип билдәләне Башҡортостан Сәнәғәт һәм инновация сәйәсәте министрлығының урман сәнәғәте комплексы бүлеге начальнигы Илдар Әсәҙуллин.

Ведомство мәғлүмәттәре буйынса, төбәктең урман сәнәғәте комплексына бөтә милек формаһындағы 1128 ойошма, шул иҫәптән 272 — ағас әҙерләү, 531 — ағас эшкәртеү, 324 мебель етештереү предприятиеһы, 1 урман химияһы комбинаты инә. 2016 йылда оҙатылған продукцияның күләме 7 миллиард һум тәшкил иткән, сәнәғәт етештереүе индексы — 138,6 процент.