Башҡортостанда «АгроКомплекс-2017» халыҡ-ара күргәҙмәһе асылды

ӨФӨ, 2017 йыл, 14 март. /«Башинформ» мәғлүмәт агентлығы, Галина Бахшиева/. Өфөлә Агросәнәғәт форумы һәм XXVII «АгроКомплекс-2017» халыҡ-ара күргәҙмәһе асылды. Сараны асыу тантанаһында Башҡортостан Хөкүмәте Премьер-министры урынбаҫары Ирек Мөхәмәтдинов, Рәсәйҙең Сәнәғәт һәм сауҙа министрлығы департаменты директоры урынбаҫары Сергей Киселев, «Союзмолоко» рәйесе Андрей Даниленко, Чехия Республикаһының Рәсәйҙәге илселегенең аграр дипломаты Никола Грушкова һәм башҡа рәсми кешеләр ҡатнашты.

Бөгөн «АгроКомплекс» ауыл хужалығы күргәҙмәләре араһында әһәмиәте һәм күләме буйынса Волга буйы федераль округында төп һәм илдә өсөнсө күргәҙмә булып тора.

Өфөләге күргәҙмә һәм форум эшендә Рәсәйҙән, шулай уҡ яҡын һәм алыҫ сит илдәрҙән 300-ҙән ашыу компания ҡатнаша. Улар араһында — Белоруссия, Украина, Ҡаҙағстан, Германия, Нидерланд, Франция, Польша, Италия, Англия, Бельгия һәм Ҡытай. Быйыл күргәҙмә экспозицияһының дөйөм майҙаны 15 мең квадрат метрҙан ашыу тәшкил итә.

Күргәҙмә «Ауыл хужалығы техникаһы», «Малсылыҡ», «Ветеринария», «Үҫемлекселек», «Аҙыҡ-түлек», «Эшкәртеүсе ҡорамал», «Инвестициялар һәм лизинг» бүлектәренән тора.

«Алексеевка» совхозы ҡыҙыл эремсек һәм Ацидофилин әсе һөт продуктын тәҡдим иткән, йәшелсә шарлауығы рәүешендә эшләнгән йәшелсә экспозицияһы иһә бер кемде лә битараф ҡалдырманы.

Башҡортостандың Умартасылыҡ һәм апитерапия буйынса ғилми-тикшеренеү үҙәге күргәҙмәлә 250-нән ашыу продукция менән таныштырҙы, шуларҙың дүрттән бер өлөшө тиерлек яңы.

«Башҡортостан аҙыҡ-түлеге» брендының стенды янында ла байтаҡ халыҡ йыйылды. Өҫтәүенә күпселек предприятиелар продукцияны тәмләп ҡарауҙы һәм һатыуҙы ойошторғайны.

Сараларҙың эшлекле программаһы ла ифрат бай. Агросәнәғәт комплексын артабан үҫтереү буйынса пленар ултырыштан тыш, унда ғилми-ғәмәли конференциялар, түңәрәк өҫтәлдәр, семинарҙар, B2B форматында осрашыуҙар, шулай уҡ дәүләт секторы вәкилдәре, агросәнәғәт комплексы предприятиелары етәкселәре, эшҡыуарлыҡ, финанс институттары вәкилдәре һәм тармаҡ эксперттары менән осрашыуҙар үткәреү ҡаралған.

Агросәнәғәт форумы һәм «АгроКомплекс» халыҡ-ара күргәҙмәһе 17 мартҡа тиклем эшләй.