Төбәктә Агрофорумда перспективалы проекттарға инвестициялар йәлеп итеүгә баҫым яһала

ӨФӨ, 2017 йыл, 7 март. /«Башинформ» мәғлүмәт агентлығы, Галина Бахшиева/. 14-17 мартта Өфөләге «ВДНХ-Экспо» майҙансығында Агросәнәғәт форумы һәм XXVII халыҡ-ара махсуслашҡан «Агрокомплекс-2017» күргәҙмәһе уҙа.

Бөгөн матбуғат конференцияһында Башҡортостан ауыл хужалығы министры Илшат Фазрахманов хәбәр итеүенсә, быйыл агросәнәғәт комплексы өлкәһендә төбәк өсөн перспективалы, ҡыҙыҡлы һәм кәрәкле проекттарға инвестициялар йәлеп итеүгә баҫым яһала. Шуға күрә форумға һәм күргәҙмәгә булған ҡыҙыҡһыныу осраҡлы түгел. Әлеге мәлгә Нидерланд, Германия, Франция, Польша, Италия, Англия, Бельгия, Ҡытай, Ҡаҙағстан, Украина, Белоруссия компаниялары ҡатнашыуҙары хаҡында белдергән. Бынан тыш, Өфөгә Рәсәйҙең 33 төбәгенән компаниялар килә. Көньяҡтағы төбәктәр — Ростов өлкәһе, Краснодар крайы, Адыгей Республикаһы, Ставрополь крайы тәүге тапҡыр тәҡдим ителгән.

Башҡортостан Ауыл хужалығы министрлығының матбуғат хеҙмәтендә хәбәр итеүҙәренсә, бай эшлекле программа көтөлә. «Агросәнәғәт комплексын үҫтереүҙең стратегик йүнәлештәре: етештереү, эшкәртеү, сауҙа һәм экспорт» пленар ултырышы эшлекле программаның төп ваҡиғаһы буласаҡ.

Шулай уҡ илдәге билдәле эксперттар, төбәктәге төп предприятиелар етәкселәре ҡатнашлығында 30-ға яҡын түңәрәк өҫтәл, конференциялар, семинарҙар ойошторола. B2B форматында осрашыуҙар үткәреү ҡаралған.