Республика ихаталарҙы төҙөкләндереүгә 856 миллион һум аҡса аласаҡ

ӨФӨ, 2017 йыл, 7 март. /«Башинформ» мәғлүмәт агентлығы, Ольга Мортазина/. 2017 йылда республика заманса ҡала мөхитен булдырыу буйынса милли проектты бойомға ашырыу сиктәрендә федераль бюджеттан 856 миллион һум аҡса аласаҡ. Был хаҡта Башҡортостандың торлаҡ-коммуналь хужалыҡ министры Сергей Афонин ведомствоның йомғаҡлау коллегияһында хәбәр итте. Республика ҡаҙнаһынан берлектә финанслау – 175 миллион һум (17%), проект аҡсаһы 1,31 миллиард һум тәшкил итәсәк.

Аҡсаларҙың өстән ике өлөшө – ихаталарҙы төҙөкләндереүгә, ҡалғаны халыҡ күп йөрөгән урындарҙы тәртипкә килтереүгә йүнәлтелә. Проектта ҡатнашыу өсөн һайлап алынған ихаталарҙа йәшәүселәр үҙ аҡсаларын индереп ҡатнаша алыуҙары хаҡында хәбәрҙар. Аҡса эштәрҙе башҡарыуға бүленгән сумманан 5 процент тәшкил итергә тейеш. Күп кенә ихаталар өсөн гараждарҙы һәм законһыҙ төҙөлгән йорттарҙы һүтеүҙән бушаған участкаларға асфальт түшәү, парковкаларҙы тәртипкә килтереү тәҡдим ителә.

Федераль киң мәғлүмәт саралары хәбәр иткәнсә, 2017 йылда Рәсәй Хөкүмәте 20 миллиард һум аҡса бүлергә һәм 1 мартҡа тиклем төбәктәр менән килешеү төҙөргә ниәтләй. Проект инвалидтар өсөн шарттарҙы иҫәпкә алып, 1000-дән ашыу кеше йәшәгән тораҡ пункттарҙа төҙөкләндереү буйынса сараларҙы күҙ уңында тота.