Башҡортостандың баш ҡалаһы «Өфө-Ладья» халыҡ кәсептәре фестиваленә әҙерләнә

ӨФӨ, 2017 йыл, 27 февраль. /«Башинформ» мәғлүмәт агентлығы, Ольга Мортазина/. Башҡортостандың баш ҡалаһы «Өфө-Ладья. Арт. Һөнәр. Сувенирҙар» халыҡ кәсептәре күргәҙмә-фестиваленә әҙерләнә. Сара дүртенсе тапҡыр ойошторола һәм 29-31 мартта уҙа. Ойоштороусылар — Башҡортостан Сәнәғәт һәм инновацион сәйәсәт министрлығы, Мәҙәниәт министрлығы, республиканың Сауҙа һәм ҡулланыусылар хоҡуғын яҡлау буйынса дәүләт комитеты. Фестивалдә республиканың төрлө мөйөштәренән биҙәү-ҡулланма сәнғәте оҫталары, сувенир продукцияһын етештереүселәр һәм һатыусылар, рәссамдар, скульпторҙар ҡатнаша. Халыҡ художество кәсептәренең төрлө әйберҙәре, сувенир продукцияһы, йорт йыһазы, милли кейем һәм башҡа бик күп әйберҙәр тәҡдим ителә.

«Былтыр Өфөләге халыҡ ижады күргәҙмәһенә Башҡортостан Башлығы Рөстәм Хәмитов килгәйне. Ул экспозицияның республика өсөн әһәмиәтен билдәләне, шул иҫәптән төбәктә Бөтә донъя Фольклориадаһын уҙғарыуға әҙерлек барышында», — тип билдәләнеләр Башҡортостан Хөкүмәтенең матбуғат хеҙмәтендә.