Төбәктең дәүләт хеҙмәттәре порталында пособие һәм субсидия юлларға мөмкин

ӨФӨ, 2017 йыл, 21 февраль. /«Башинформ» мәғлүмәт агентлығы, Галина Бахшиева/. Башҡортостан халҡы төбәк дәүләт хеҙмәттәре порталында пособие һәм субсидияларҙы электрон төрҙә юллай ала.

Әлеге ваҡытта порталда социаль ярҙам сараларын биреү буйынса алты дәүләт хеҙмәтен электрон төрҙә алырға мөмкин. Һүҙ торлаҡ һәм коммуналь хеҙмәттәр өсөн түләүгә субсидиялар, аҙ тәьмин ителгән граждандарҙың айырым категорияларына социаль пособие, ваҡытлыса эшкә һәләтһеҙлек буйынса һәм әсәлеккә бәйле мотлаҡ социаль страховкаға эйә булмаған граждандарға баланы йәш ярымға тиклем тәрбиәләгән өсөн айлыҡ пособие тураһында бара.

Бынан тыш, порталда ваҡытлыса эшкә һәләтһеҙлек буйынса һәм әсәлеккә бәйле мотлаҡ социаль страховкаға эйә булмаған граждандарға бала тыуғанда бер тапҡыр бирелә торған пособие, күп балалы ғаиләләрҙең айырым категорияларына айлыҡ пособие, балалары булған студент һәм аспирант ғаиләләренә пособие юлларға мөмкин.

Башҡортостандың Хеҙмәт һәм халыҡты социаль яҡлау министрлығында аңлатыуҙарынса, дәүләт һәм муниципаль хеҙмәттәрҙе электрон төрҙә күрһәтеү республиканың муниципаль райондарында теркәлгән, әммә ҡалала йәшәгәндәр өсөн бик уңайлы.